وزیر صحت نے مزید کہا کہ وزارت صحت نیشنل ڈیزاسٹر منیجمنٹ اتھارٹی اور صوبائی حکومت کے ساتھ قریبی رابطے میں رہ کر مربوط کوآرڈینیشن کے ذریعے امدادی کاموں کو تیز کرے۔ ان کا کہنا تھا کہ این ڈی ایم اے کے ساتھ مل کر متاثرہ آبادی کو بہترین طبی سہولیات فراہم کی جائیں گی۔
مصطفیٰ کمال نے کہا کہ حکومت سیلاب سے متاثرہ خاندانوں کے ساتھ اس کٹھن وقت میں شانہ بشانہ کھڑی ہے اور ہر ممکن تعاون فراہم کرے گی۔
وفاقی وزارت صحت نے سیلاب متاثرین کو طبی سہولیات فراہم کرنے کے لیے ادویات، ویکسین اور دیگر ضروری سامان کی پہلی کھیپ متاثرہ علاقوں کی جانب روانہ کر دی ہے۔ وزیر صحت مصطفی کمال کے مطابق بھیجی گئی اشیاء میں ڈھائی لاکھ یونٹس پنٹاویلنٹ ویکسین، ڈیڑھ لاکھ یونٹس خسرہ و روبیلا ویکسین، دو لاکھ اکانوے ہزار پانچ سو سرنجز اور تین ہزار سیفٹی باکسز شامل ہیں۔ اس کے علاوہ تیس ہزار ملیریا ٹیسٹنگ کٹس، ساٹھ ہزار پرائمیکوئن گولیاں اور دس ہزار مچھر دانیاں بھی متاثرین تک پہنچائی جا رہی ہیں۔
وزیر صحت نے کہا کہ وزارت صحت صوبائی حکومت کے ساتھ مکمل رابطے میں ہے اور تمام ادارے اس ناگہانی آفت سے نمٹنے کے لیے الرٹ ہیں۔ ان کا مزید کہنا تھا کہ حکومت خیبر پختونخوا کے سیلاب زدہ خاندانوں کے ساتھ کھڑی ہے اور اس مشکل وقت میں متاثرین کو تنہا نہیں چھوڑا جائے گا۔
