مٹھی: تھرپارکر کے معروف معالج اور مسیحائی کردار کے حامل ڈاکٹر حاجی شفیع محمد حامداڻي میمن گزشتہ روز 88 برس کی عمر میں حیدرآباد میں اپنی رہائش گاہ پر انتقال کر گئے۔
ان کے انتقال کی خبر ملتے ہی تھرپارکر سے تعلق رکھنے والی میمن برادری اور تھری عوام میں سوگ اور غم کی لہر دوڑ گئی، جبکہ ان کے آبائی شہر ڈیپلو اور مٹھی سوگ میں بند رہے۔
مرحوم ڈاکٹر شفیع طویل عرصے تک تعلقہ اسپتال ڈیپلو کے ایم ایس رہے، جبکہ کچھ عرصہ سول اسپتال مٹھی میں بھی اپنے فرائض انجام دیتے رہے۔ وہ ایمانداری اور دیانت داری کی ایک تاریخی مثال تھے اور غریبوں کا بڑا سہارا سمجھے جاتے تھے۔ ڈیپلو کی میمن برادری انہیں غریبوں کی مدد اور علاج کے لیے لاکھوں روپے فراہم کرتی تھی۔
کہا جاتا ہے کہ ان کے ہاتھ میں قدرتی شفا تھی، جس کے باعث مختلف شہروں سے بڑی تعداد میں مریض علاج کے لیے ان کے پاس آتے تھے۔ اسی وجہ سے انہوں نے ایک بہترین معالج کی حیثیت سے بھرپور شہرت حاصل کی۔
مرحوم کی وصیت کے مطابق رات گئے ان کی میت ڈیپلو لائی گئی، جہاں ان کی آخری رسومات ادا کی جا رہی ہیں۔
