اسلام آباد : محکمہ موسمیات نے 19 دسمبر سے سرد ہواؤں کا نیا سلسلہ شروع ہونے کی پیش گوئی کردی. جس درجہ حرارت میں مزید کمی اور شدید یخ بستہ موسم کا امکان ہے۔
تفصیلات کے مطابق محکمہ موسمیات نے خبردار کیا ہے کہ 12 سے 16 دسمبر کے دوران ملک کے شمالی علاقوں میں شدید سرد ہوائیں اور برف باری متوقع ہیں۔چترال، دیر، سوات اور گلگت بلتستان میں برف باری اور یخ بستہ ہواؤں کے باعث نظامِ زندگی متاثر ہونے کا خدشہ ہے۔محکمہ موسمیات کا کہنا تھا کہ ناران، کاغان، استور، اسکردو، ہنزہ، چلاس اور غذر میں راستے بند ہونے کا امکان ہے، جبکہ کشمیر کے مختلف علاقوں میں لینڈ سلائیڈنگ کا خطرہ بھی موجود ہے تاہم بارش اور برف باری کے باعث درجہ حرارت میں نمایاں کمی متوقع ہے۔علاقائی حکام نے شہریوں کو ہدایت کی ہے کہ پہاڑی علاقوں میں سفر کے دوران غیر ضروری نقل و حرکت سے گریز کریں، قراقرم ہائی وے پر بھی ٹریفک متاثر ہونے کا خدشہ ہے۔محکمہ موسمیات نے بتایا کہ 19 دسمبر سے سرد ہواؤں کا نیا سلسلہ ملک میں داخل ہوگا, جس سے رات کے درجہ حرارت میں مزید کمی اور شدید یخ بستہ موسم کا امکان ہے۔بعض نشیبی علاقوں میں دھند اور حدِ نگاہ متاثر ہونے کا بھی امکان ہے۔
