اسلام آباد :موسمِ خزاں کا دلکش اور ذائقے دار پھل املوک (جسے جاپانی پھل یا Persimmon بھی کہا جاتا ہے) اپنی غذائیت اور بے شمار طبی فوائد کی وجہ سے تیزی سے مقبول ہورہا ہے، دیکھنے میں یہ پھل ٹماٹر سے مشابہت رکھتا ہے مگر اس کا رنگ گہرا نارنجی اور گودا نہایت نرم و شیریں ہوتا ہے۔
میڈیا رپورٹس کےمطابق ماہرین صحت کا کہنا ہے کہ پاکستان کی آب و ہوا اس کی کاشت کے لیے موزوں ہے، اسی لیے ملک کے مختلف علاقوں میں اس کی پیداوار میں نمایاں اضافہ دیکھا جا رہا ہے۔
غذائی ماہرین کے مطابق املوک وٹامن اے، بی اور سی کے ساتھ ساتھ پروٹین، کیلشیم، فاسفورس، فولاد اور پوٹاشیم سے بھرپور ہوتا ہے۔ سو گرام املوک میں صرف 80 کیلوریز پائی جاتی ہیں، جو وزن کم کرنے والوں کے لیے اسے ایک بہترین قدرتی غذا بناتی ہیں چونکہ یہ گرم مزاج پھل ہے، اس لیے ماہرین اسے اعتدال میں اور پکا ہوا کھانے کا مشورہ دیتے ہیں۔
املوک کے صحت بخش فوائد بے شمار ہیں۔ ماہرین کے مطابق یہ کمر درد میں مسلسل درد کی شکایت کرنے والوں کے لیے فائدہ مند ہے، گلے کی خراش اور سوزش کو دور کرتا ہے، سخت مشقت کے بعد پٹھوں کے درد اور اکڑن کو کم کرتا ہے، نظامِ ہاضمہ کو بہتر بناتا اور قبض کو دور کرتا ہے، بڑی آنت کی خرابیوں اور آنتوں کے ورم میں مفید ہے، دل کی بیماریوں کے خطرات کو کم کرتا ہے، شوگر کے مریضوں کے لیے مفید سمجھا جاتا ہے کیونکہ یہ خون میں شکر کی مقدار کو متوازن رکھنے میں مدد دیتا ہے، قوتِ مدافعت بڑھاتا اور جسم کو موسمی بیماریوں سے محفوظ رکھتا ہے،
آنت کے زخموں کے بھرنے میں مددگار ہے، وزن گھٹانے کے خواہش مند افراد کے لیے ایک قدرتی معاون پھل ہے۔
ماہرینِ غذائیت کا کہنا ہے کہ املوک میں موجود قدرتی اینٹی آکسیڈنٹس جسم سے زہریلے مادّے خارج کرتے ہیں اور جلد کو تروتازہ اور شفاف بناتے ہیں۔ البتہ وہ خبردار کرتے ہیں کہ کچا املوک کھانے سے معدے پر دباؤ پڑ سکتا ہے، اس لیے صرف پکا ہوا اور میٹھا پھل ہی استعمال کیا جائے۔
املوک نہ صرف ایک ذائقے دار پھل ہے بلکہ قدرت کی طرف سے دیا گیا ایک مکمل قدرتی علاج بھی ہے جو جسمانی توانائی، دل کی صحت اور مدافعتی نظام کے لیے انتہائی مفید ثابت ہوتا ہے۔
