لندن: برطانیہ کی کاؤنٹی سرے میں مقیم ایک خوشحال خاندان نے اپنے رہائشی امور اور پالتو جانوروں کی دیکھ بھال کے لیے ایک تجربہ کار اور قابل اعتماد ہاؤس کیپر کی تلاش شروع کر دی ہے جس کی سالانہ تنخواہ تقریباً 2 کروڑ روپے کے قریب مقرر کی گئی ہے۔
مذکورہ خاندان کا تعلق سرے کے گاؤں چوبہم سے ہے جہاں انہیں ایک ایسے متحرک اور خود مختار شخص کی ضرورت ہے جو ان کے بڑے گھر کے روزمرہ معاملات کو انتہائی خوش اسلوبی اور ذمہ داری کے ساتھ چلانے کی مکمل صلاحیت رکھتا ہو۔ یہ ایک کل وقتی ملازمت ہے۔
اس نوکری کے حصول کے لیے امیدوار کو ہفتے میں 5 دن یعنی پیر سے جمعہ تک کام کرنا ہوگا جس کے دوران مجموعی طور پر 40 گھنٹے کام کی ضرورت ہوگی۔ خاندان کا کہنا ہے کہ کام کے اوقات میں کچھ حد تک لچک کا مظاہرہ بھی کیا جا سکتا ہے۔
ملازم کی بنیادی ذمہ داریوں میں گھر کی دیکھ بھال کے ساتھ ساتھ خاندان کے 2 پالتو کتوں کا مکمل خیال رکھنا شامل ہے۔ اس میں انہیں روزانہ کی بنیاد پر سیر کروانا، وقت پر خوراک مہیا کرنا اور گھر کے اندر اور باہر ان کی نقل و حرکت پر نظر رکھنا شامل ہوگا۔
خاندان نے اپنی اس پیشکش کو ایک دوستانہ اور سادہ مزاج ماحول قرار دیا ہے جہاں ہاؤس کیپر کو گھر کی تمام تر گھریلو ذمہ داریاں خود مختار انداز میں سنبھالنی ہوں گی۔
اس ملازمت کا آغاز رواں سال ستمبر کے مہینے سے ہوگا جس کے لیے بھرتی کا عمل جاری ہے۔
تنخواہ کے حوالے سے بتایا گیا ہے کہ کامیاب امیدوار کو اس کے تجربے کی بنیاد پر سالانہ 45 سے 50 ہزار برطانوی پاؤنڈ تک ادا کیے جائیں گے، جو پاکستانی کرنسی میں تقریباً ایک کروڑ نواسی لاکھ روپے بنتے ہیں۔ یہ پیشکش ان افراد کے لیے بہترین ہے جو گھریلو انتظام اور جانوروں کی دیکھ بھال میں دلچسپی رکھتے ہیں۔
امیدوار کا متحرک ہونا اور کام کے دوران مستعد رہنا بہت ضروری ہے تاکہ گھر کے معمولات متاثر نہ ہوں۔
یہ ملازمت اپنی خطیر تنخواہ کے باعث لوگوں کی توجہ کا مرکز بنی ہوئی ہے اور توقع ہے کہ جلد ہی اس کے لیے موزوں امیدوار کا انتخاب کر لیا جائے گا۔
