اسلام آباد: ہائر ایجوکیشن کمیشن (HEC) نے بلوچستان کے ہونہار طلبہ کے لیے ایل ایل ایم اور پی ایچ ڈی اسکالرشپس کا اعلان کیا ہے، اسکالرشپس کے تحت بلوچستان کے طلبہ کو ملکی جامعات میں ایل ایل ایم اور بیرون ملک ایل ایل ایم و پی ایچ ڈی کے مواقع فراہم کیے جائیں گے، اسکالرشپ کے لیے امیدوار کا بلوچستان ڈومیسائل اور لوکل سرٹیفکیٹ ہونا ضروری ہے۔
ایل ایل ایم اسکالرشپ کے لیے عمر کی بالائی حد 30 سال اور پی ایچ ڈی کے لیے 35 سال مقرر کی گئی ہے، درخواست دہندگان کے لیے ضروری ہے کہ انہوں نے ایل ایل بی اور ایل ایل ایم مکمل کیے ہوں اور کم از کم 50 فیصد نمبر حاصل کیے ہوں، اس کے علاوہ اپٹیٹیوٹ ٹیسٹ میں بھی 50 فیصد نمبر درکار ہیں۔ درخواستیں جمع کرانے کی آخری تاریخ 13 جنوری 2026 مقرر کی گئی ہے۔
مزید برآں ہائر ایجوکیشن کمیشن نے پاکستان کی جامعات اور اداروں میں ایل ایل بی ڈگری پروگرام کے لیے لا ایڈمیشن ٹیسٹ کا شیڈول بھی جاری کیا ہے۔ درخواستیں جمع کرانے کی آخری تاریخ 29 دسمبر 2025 ہے جبکہ ٹیسٹ 25 جنوری 2026 کو لیا جائے گا۔
یہ اسکالرشپس اور داخلہ ٹیسٹ بلوچستان کے طلبہ کے تعلیمی مواقع کو بڑھانے اور اعلیٰ تعلیم کے لیے رہنمائی فراہم کرنے کے لیے اہم اقدام سمجھے جا رہے ہیں۔
