گوگل نے اپنا جدید ترین اور سب سے طاقتور اے آئی ماڈل جیمنائی 3 متعارف کرا دیا ہے۔
یہ نیا ماڈل اب جیمنائی ایپ اور اے آئی سرچ انجن کے انٹرفیس کے ذریعے صارفین کے لیے دستیاب ہے۔
واضح رہے کہ جیمنائی 2.5 صرف سات ماہ قبل جاری کیا گیا تھا، اور اب اس سے بھی زیادہ ترقی یافتہ لارج لینگوئج ماڈل پیش کیا گیا ہے۔
گوگل نے یہ نیا ورژن ایسے وقت میں لانچ کیا ہے جب چند روز پہلے اوپن اے آئی نے جی پی ٹی 5.1 پیش کیا تھا۔
کمپنی کے بیان کے مطابق جیمنائی 3 میں منطقی سوچ اور استدلال کی صلاحیت میں نمایاں بہتری لائی گئی ہے۔
گوگل کا کہنا ہے کہ یہ ماڈل ایسی باریک تفصیلات اور گہرائی سے ردِعمل دیتا ہے جو پہلے دیکھنے میں نہیں آئیں۔
جیمنائی 3 کے بنیادی ماڈل کے ساتھ جیمنائی 3 ڈیپ تھنک بھی متعارف کرایا گیا ہے، جو تحقیق میں معاونت کے لیے تیار کیا گیا ہے اور آئندہ ہفتوں میں گوگل اے آئی الٹرا کے سبسکرائبرز کو دستیاب ہوگا۔
کمپنی کے مطابق جیمنائی ایپ کے ماہانہ صارفین کی تعداد 65 کروڑ سے بڑھ چکی ہے۔
مزید یہ کہ گوگل نے جیمنائی پر مبنی پاور کوڈنگ انٹرفیس گوگل اینٹی گریویٹی بھی پیش کیا ہے، جو ملٹی ایجنٹ کوڈنگ کی صلاحیت رکھتا ہے۔
