پاکستان ٹریڈ یونین فیڈریشن کی وزیر محنت سعید غنی سے ملاقات
کراچی: آج پاکستان ٹریڈ یونین فیڈریشن (PTUF) کے ایک وفد نے جنرل سیکریٹری عبدالغنی کلہوڑو کی قیادت میں وزیر محنت سعید غنی سے ملاقات کی۔ اس موقع پر صدر احمد زیب اور فنانس سیکریٹری شریف خان بھی ان کے ہمراہ موجود تھے۔
ملاقات کے دوران عبدالغنی کلہوڑو نے وزیر محنت کو ورکرز ویلفیئر بورڈ سندھ کو درپیش سنگین مسائل سے آگاہ کیا اور فوری اصلاحی اقدامات کی ضرورت پر زور دیا۔ انہوں نے بتایا کہ افسروں کی غفلت اور ذاتی مفادات کے باعث مزدوروں کو بھاری نقصان پہنچا ہے، جبکہ ویلفیئر اسکیموں اور بجٹ میں اربوں روپے کی کرپشن اور غلط استعمال کے شواہد سامنے آئے ہیں۔
انہوں نے مزید بتایا کہ مزدوروں کے مسائل کے حل کے لیے ایک آئینی درخواست (CP) سندھ ہائی کورٹ کراچی میں دائر کی جا چکی ہے، جبکہ ایک اور درخواست جلد ہی سکھر میں بھی دائر کی جائے گی۔
اس موقع پر وزیر محنت سعید غنی نے وفد کے خدشات کو تسلیم کرتے ہوئے بتایا کہ آج ان کی پرواز ہے، تاہم انہوں نے اگلے ہفتے ملاقات کی یقین دہانی کرائی۔ وزیر محنت نے کہا کہ وہ مزدوروں کے مفادات کے مطابق تمام مسائل حل کریں گے اور متعلقہ افسران کے خلاف مناسب کارروائی عمل میں لائیں گے۔
آخر میں جنرل سیکریٹری عبدالغنی کلہوڑو نے وزیر محنت کا شکریہ ادا کیا، اور دونوں فریقین نے اتفاق کیا کہ اگلے ہفتے دوبارہ ملاقات کی جائے گی تاکہ مزدوروں کی فلاح و بہبود سے متعلق معاملات پر مزید پیشرفت کی جا سکے، ان شاءاللہ۔
